အာဏာသိမ်းခဲ့သည့် ဖေဖော်ဝါရီလမှ စတင်ကာ ယနေ့ထိ အာဏာလုစစ်ကောင်စီက လူပေါင်း ၆၁၀၀ ကျော်ဖမ်းဆီးခဲ့ပြီးဖြစ်သည်။ ယင်းအနက် ၄၉၀၀ ကျော်မှာ ဖမ်းဆီးခံထားရဆဲဖြစ်ကာ ၁၉၀၀ ကျော် ဖမ်းဝရမ်း ထုတ်ခံထားရသည်။ ဒီမိုကရေစီအရေး လှုပ်ရှားသူများနှင့် စစ်ကောင်စီကို ဆန့်ကျင်သူများအား ဖမ်းဆီးရာတွင် အများပြည်သူပိုင် နေရာများတွင် တပ်ဆင်ထားသည့် စီစီတီဗွီများ အသုံးပြုကာ ကားနံပါတ်များကို မှတ်တမ်းတင်ထားပြီး လူမျက်နှာများကို ခြေရာခံသည့် နည်းပညာကို စစ်ကောင်စီက တွင်တွင်ကျယ်ကျယ် အသုံးပြုနေပြီဖြစ်သည်။
ယခင်အစိုးရ၊ ဒေါ်အောင်ဆန်းစုကြည် လက်ထက် Safe City Project ဟု လူသိများသည့် စီမံကိန်းများမှာ ပြည်ထဲရေးဝန်ကြီးဌာန၏ စီမံကိန်းများဖြစ်ပြီး အများပြည်သူပိုင် နေရာများနှင့် လုံခြုံရေးအားနည်းသည့် နေရာများတွင် စီစီတီဗွီများ တပ်ဆင်ကာ လုံခြုံရေးအတွက် စောင့်ကြပ်စစ်ဆေးနိုင်ရန် အကောင်အထည်ဖော်ခဲ့ခြင်းဖြစ်သည်။ ယင်း Safe City စီမံကိန်းများကို စစ်ကောင်စီက သိမ်းပိုက်လိုက်ကာ ရှိနှင့်ပြီးသား နည်းပညာ အဆောက်အအုံးများအား အဆင့်သင့် အသုံးချနေခြင်းလည်း ဖြစ်သည်။
မန္တလေး Safe City စီမံကိန်း၊ မော်လမြိုင် Safe City စီမံကိန်း၊ ရန်ကုန် နေပြည်တော် အဝေးပြေးလမ်းမ စီစီတီဗွီတပ်ဆင်ရေး စီမံကိန်းနှင့် နေပြည်တော် Safe City စီမံကိန်းတို့မှာ ဒေါ်အောင်ဆန်းစုကြည် အစိုးရလက်ထက်ကတည်းက ကြိုတင်ပြင်ဆင်ခဲ့သည့် အဆင့်မြင့်နည်းပညာသုံး စောင့်ကြည့်ရေး စီမံချက်များ ဖြစ်သည်။
မန္တလေး Safe City စီမံကိန်းနှင့် နေပြည်တော် Safe City စီမံကိန်းတို့တွင် စောင့်ကြပ်ကြည့်ရှုရေး စင်တာများနှင့် စီစီတီဗွီများမှာ ဒေါ်အောင်ဆန်းစုကြည် အစိုးရလက်ထက်ကတည်းက ပထမအဆင့် ပြင်ဆင်ခဲ့ပြီး ဖြစ်သလို မော်လမြိုင် Safe City စီမံကိန်း၊ ရန်ကုန် နေပြည်တော် အဝေးပြေး လမ်းမကြီး စီမံကိန်းတို့မှာ လက်ရှိ မင်းအောင်လှိုင်စစ်ကောင်စီ လက်ထက်တွင်မှ အကောင်အထည်ဖော်နေခြင်းဖြစ်သည်။ ထို့ပြင် မပြီးပြတ်သေးသည့် မန္တလေးနှင့် ရန်ကုန်မြို့တွင်း စီမံကိန်းများကိုလည်း အပြီးသတ်ရန် အရှိန်မြှင့် ပြင်ဆင်နေသည်။
လက်ရှိအချိန်ထိ နေပြည်တော်နှင့် ရန်ကုန်မြို့၏ နေရာအချို့တွင် တပ်ဆင်ထားပြီးသည့် စီစီတီဗွီများကို အသုံးပြု၍ ကားနံပါတ်ပြားများကို ခြေရာခံနိုင်ပြီး ပြစ်မှုကျူးလွန်ဖူးသူများ၏ ရာဇဝတ်မှု နောက်ခံအကြောင်းအရာများလည်း တိုက်ဆိုင်ကြည့်ရှုစစ်ဆေးနိုင်သည်။
ထို့ပြင် မြန်မာကျပ်ငွေ အနည်းဆုံး သိန်း ၅၀၀ ကျော်တန် အချို့ နည်းပညာမြင့် စီစီတီဗွီများမှာ လမ်းပေါ်တွင် သွားလာနေသည့် ကားအတွင်းထိုင်နေသည့် လူမျက်နှာကို ဓာတ်ပုံရိုက်ထားနိုင်သလို လမ်းမကြီးများပေါ်တွင် လူရာချီအုပ်စုလိုက် သွားလာနေသည့်အနက်မှ လူတစ်ဦးချင်းစီ၏ မျက်နှာများကိုလည်း ဓာတ်ပုံရိုက် မှတ်တမ်းတင်ထားနိုင်သည်။
ယင်းစီမံကိန်းများကို အကောင်အထည်ဖော်ရာတွင် စစ်ကောင်စီ၏ လိုလားချက်များကို ဖြည့်ဆည်းပေးနေသည့် ကုမ္ပဏီများရှိနေသည်။ အဆိုပါ ကုမ္ပဏီများမှာ ဒေါ်အောင်ဆန်းစုကြည် လက်ထက်ကတည်းက တင်ဒါရရှိခဲ့ဖူးသည့် ကုမ္ပဏီများဖြစ်ပြီး စစ်ကောင်စီ လက်ထက်တွင် လုပ်ပိုင်ခွင့် ပိုမိုရရှိလာကြခြင်းဖြစ်သည်။ ယင်းကုမ္ပဏီများအနက် စစ်ကောင်စီကို အဓိက ကူညီပေးကာ ယနေ့ချိန်ထိ တွင်တွင်ကျယ်ကျယ် လုပ်ကိုင်နေသည့် ကုမ္ပဏီနှစ်ခုကို ဖော်ပြလိုက်ပါသည်။
Naung Yoe Technologies Co., Ltd.
နောင်ရိုး ကုမ္ပဏီမှာ ယခုနှစ် (၂၀၂၁) ဇန်နဝါရီလ အာဏာမသိမ်းမီက သမ္မတရုံးတွင် စီစီတီဗွီတပ်ဆင်ရေး လုပ်ငန်းများ လုပ်ကိုင်ရန် တင်ဒါ ရရှိခဲ့သည့် ကုမ္ပဏီများအနက် တစ်ခုဖြစ်သည်။ နောင်ရိုးကုမ္ပဏီကို ရဲဝင့်ထွဋ်တင် ဆိုသူက ၂၀၀၅ ခုနှစ်ကတည်းက စတင်တည်ထောင်ခဲ့ပြီး ထိပ်ပိုင်းဝန်ထမ်းအများစုမှာ စစ်တပ်မှ အငြိမ်းစား အရာရှိများဖြစ်သည်ဟု စုံစမ်းသိရှိရသည်။
နောင်ရိုးကုမ္ပဏီသည် ထောက်လှမ်းရေး နည်းပညာ ပစ္စည်းများ အဓိက တင်သွင်းသည့် ကုမ္ပဏီတစ်ခုဖြစ်သလို စီစီတီဗွီတပ်ဆင်ရေးအပိုင်းတွင်လည်း အစိုးရနှင့်ပူးပေါင်းရာတွင် နာမည်ကြီးသည့် ကုမ္ပဏီဖြစ်သည်။ ၎င်းတို့ကုမ္ပဏီ၏ ကြော်ငြာရေးသားချက်များအရ လွှတ်တော်အဆောက်အအုံများ၊ လေဆိပ်များနှင့် မြို့တော်ခန်းမများတွင် စီစီတီဗွီတပ်ဆင်ရေး လုပ်ငန်းများ လုပ်ကိုင်ခဲ့ဖူးပြီး ဝန်ထမ်းပေါင်း ၂၀၀ ဝန်းကျင်ရှိသည့် ကုမ္ပဏီတစ်ခုဖြစ်သည်။
“သူတို့က အစိုးရ ပရောဂျက် (Project - စီမံကိန်း) တွေ လုပ်တာများတယ်။ ခန့်ထားတာကလည်း အရင်က ဗိုလ်ချုပ်တွေချည်းပဲ။ ဒီလူတွေနဲ့ဆိုတော့ စစ်တပ်ဘက်က တင်ဒါတွေလည်း ရတယ်။ ဝင်ရ ထွက်ရ လွယ်တာပေါ့” ဟု နောင်ရိုးကုမ္ပဏီနှင့် နီးစပ်သည့် အမည်မဖော်လိုသူ တစ်ဦးက ဆိုသည်။
သမ္မတဦးဝင်းမြင့်လက်ထက် မတိုင်ခင်ကတည်းက အစိုးရနှင့်နီးကပ်စွာ အလုပ်လုပ်ခဲ့သည့် ကုမ္ပဏီတစ်ခု ဖြစ်ကာ ကုမ္ပဏီရှိ ထိပ်ပိုင်းဝန်ထမ်းများမှာ အငြိမ်းစားဗိုလ်ချုပ်များဖြစ်သည့်အတွက် လက်ရှိအာဏာသိမ်း စစ်ကောင်စီလက်ထက်တွင်မူ အချိတ်အဆက်များ လွယ်ကူလာကာ လုပ်ပိုင်ခွင့်များလည်း ပိုမို ရရှိလာခြင်းဖြစ်သည်ဟု နီးစပ်သူများက ဆိုသည်။
နေပြည်တော်တွင် ၂၀၂၀ ခုနှစ် ဒီဇင်ဘာ ၁၄ ရက်က ဖွင့်လှစ်ခဲ့သည့် Command and Control Center (ထိန်းချုပ်ညွှန်ကြားရေး စင်တာ) နှင့် စီစီတီဗွီတပ်ဆင်ရေး လုပ်ငန်းများကို အဓိက တင်ဒါရခဲ့သူများအနက် နောင်ရိုးကုမ္ပဏီလည်း ပါဝင်သည်။ ယင်းပွဲသို့ Command and Control Center တည်ဆောက်ရေး အကြံပေး ကော်မတီ ဥက္ကဋ္ဌ ဦးမြင့်ဆွေ၊ Linn IT Solution ကုမ္ပဏီ မန်းနေးဂျင်းဒါရိုက်တာ ဦးနေလင်းထိုက်နှင့် နောင်ရိုးကုမ္ပဏီပိုင်ရှင် ဦးရဲဝင့်ထွဋ်တင်တို့ တက်ရောက်ခဲ့သည်ကို တွေ့ရသည်။
နေပြည်တော်တွင် ဆန္ဒထုတ်ဖော်မှုများကို ဦးဆောင်သူများနှင့် ဒီမိုကရေစီလိုလားသူများကို စစ်ကောင်စီက ဖမ်းဆီးခဲ့ရာတွင် အဆိုပါ နောင်ရိုးကုမ္ပဏီနှင့် အပေါင်းအပါကုမ္ပဏီများက တပ်ဆင်ပေးထားသည့် စီစီတီဗွီများကို အသုံးပြုကာ လုပ်ဆောင်နေခဲ့ခြင်း ဖြစ်သည်။
“Linn IT Solution နဲ့ နောင်ရိုးနဲ့တွဲပြီး နေပြည်တော်မှာ စကစ (စစ်ကောင်စီ) နဲ့ တွဲပြီး လွှတ်တော်၊ နေပြည်တော် Safe City အတွက် လက်ရှိမှာ လုပ်နေတုန်းပဲ။ စီစီတီဗွီတွေ တပ်နေတုန်း။ အရင်တုန်းက ရ ထားတယ်ဆိုတာထက် ခု စစ်ကောင်စီလက်ထက်မှာ ပိုရသွားတဲ့ သဘောပေါ့” ဟု သတင်းပေးလာသူ တစ်ဦးက ဆိုသည်။
Mratt’s Channel က ရရှိထားသည့် စာရွက်စာတမ်းတစ်စောင်အရ စစ်ကောင်စီ၏ Safe City Solution System တည်ဆောက်တပ်ဆင်ခြင်း တင်ဒါကော်မတီဥက္ကဋ္ဌ ဗိုလ်မှူးကြီး နေထွဋ်ဦးက ယခုနှစ် ဧပြီလ ၈ ရက်နေ့တွင် မော်လမြိုင်မြို့တွင် စီစီတီဗွီများ အမြန် တပ်ဆင်နိုင်ရေး အမိန့်စာတစောင် ထုတ်ပြန်ခဲ့သည်ကိုလည်း တွေ့ရသည်။
လာဘ်ထိုးခဲ့သည့် နောင်ရိုး
အမိန့်စာအရ နေပြည်တော်၊ ရန်ကုန်နှင့် မန္တလေးမြို့တို့တွင်သာ မက မော်လမြိုင်မြို့တွင်လည်း စီစီတီဗွီတပ်ဆင်ရေး လုပ်ငန်းများ စတင်တော့မည်ဖြစ်ကာ ‘အမြန်ချိတ်ဆက်ဆောင်ရွက်ရန်’ စစ်ကောင်စီက ပြင်ဆင်နေသည်ကို တွေ့ရပြီး နောင်ရိုးကုမ္ပဏီနှင့် အခြား ကုမ္ပဏီတစ်ခု (အပိုင်း ၂ တွင် ဆက်လက်ဖတ်ရှုပါ) က လုပ်ပိုင်ခွင့်ရရှိထားခြင်းဖြစ်သည်။
“တကယ်က နောင်ရိုးကုမ္ပဏီက ဒီ ပရောဂျက်ကို လိုက်နေတာ ကြာပြီ၊ အရင်အစိုးရ လက်ထက်ကတည်းကပဲ။ မွန်ပြည်နယ်ဝန်ကြီးချုပ် ဒေါက်တာအေးဇံကိုတောင် လဘ်ထိုးဖို့ လုပ်ခဲ့သေးတယ်။ မရခဲ့ဘူး” ဟု သတင်းပေးလာသူ တစ်ဦးက ဆိုသည်။
နောင်ရိုးကုမ္ပဏီနှင့် ပတ်သက်၍ အခြား သတင်းပေးလာသူ တစ်ဦး၏ ပြောဆိုချက်မှာလည်း “အန်အယ်ဒီ လက်ထက်မှာလည်း ဝန်ကြီးတွေကို လဘ်ထိုးခဲ့သေးတယ်။ မယူဘူးဆိုရင် ကားပေါ်ကို အတင်း ပိုက်ဆံပစ်ထည့်ပေးတာမျိုးအထိ ရှိခဲ့တယ်” ဟု ဆိုသည်။
မန္တလေးက နောင်ရိုး
မန္တလေးမြို့ Safe City Project နှင့်ပတ်သက်၍ “ကျပ် ၁.၉ ဘီလျံကုန်ကျမည့် စီမံကိန်းအား ဟွာဝေး ကုမ္ပဏီက ယှဉ်ပြိုင်တင်ဒါ အောင်ခဲ့သည်။ ACE ကုမ္ပဏီနှင့် ဇာနည် အီလက်ထရောနစ် တို့က တပ်ဆင်ရေးအပိုင်းအတွက် ပြီးခဲ့သော ၂၀၂၀ နိုဝင်ဘာက ထပ်ဆင့်ကန်ထရိုက် ရရှိခဲ့ကြောင်း သိရသည်” ဟု Myanmar Now သတင်းဌာနက ဇွန်လ ၁၉ ရက်က ဖော်ပြခဲ့သည်။
သို့သော် “ဦးဇာနည်အောင်ပိုင်တဲ့ ဇာနည် အီလက်ထရောနစ်က ရထားတာတော့ ဟုတ်တယ်။ ဒါပေမယ့် အဲ့ဒီ ပရောဂျက်တွေကိုပါ နောင်ရိုးက ရအောင် လမ်းကြောင်းနဲ့ ဝင်နေတယ်” ဟု Mratt’s Channel ကို သတင်းပေးလာသူ တစ်ဦးက ဆိုသည်။ နောင်ရိုးကုမ္ပဏီပိုင်ရှင် ဦးရဲဝင့်ထွဋ်တင်၏ မန္တလေးတွင် လုပ်ကိုင်နေသည့် အခြားလုပ်ငန်းများလည်း ရှိသေးသည်။
“New Starlight က ဦးကျော်ကျော်ဝင်းပေါ့။ သိပ္ပံလမ်းနားက လေဆိပ်အဟောင်းကြီးကို တဝက်ခြမ်းပြီး New Ocean ဆိုပြီး တိုက်တွေ ဘာတွေလုပ်လိုက်တာ။ Pullman Hotel မန္တလေးကိုလည်း New Starlight က ဦးဆောင်ပြီး ဆောက်တာပေါ့။ အဲ့ဒီမှာ (နောင်ရိုးကုမ္ပဏီက) တော်တော်များများ လုပ်ခဲ့တယ်။ New Starlight ရဲ့ တိုက်ခန်းတစ်ခုဖြစ်တဲ့ လေးထပ်တိုက်မှာ နောင်ရိုးရုံးကို ဖွင့်ထားတယ်” ဟု သတင်းပေးလာသည့် အမည်မဖော်လိုသူ လူတစ်ဦးက ဆိုသည်။
New Starlight ဦးကျော်ကျော်ဝင်းနှင့် နောင်ရိုးကုမ္ပဏီတို့ ပူးပေါင်းလုပ်ဆောင်ခဲ့မှုကို Mratt’s Channel က ဆက်လက်စုံစမ်းနေဆဲဖြစ်သည်။ နောင်ရိုးကုမ္ပဏီ၏ မန္တလေးရုံးလိပ်စာမှာ ဘလောက် ၄၊ ယူနစ် ၄၊ မင်္ဂလာ ၂ လမ်းနဲ့ ဘလူးဒိုင်းမွန်း လမ်းထောင့်၊ မင်္ဂလာမန္တလေး၊ မြို့သစ် (၁)၊ ချမ်းမြသာစည် မြို့နယ်၊ ၀၅၀၄၁ ဟု တွေ့ရှိရသည်။
စင်္ကာပူက နောင်ရိုး
နောင်ရိုးကုမ္ပဏီသည် မြန်မာနိုင်ငံတွင်သာမက စင်္ကာပူနိုင်ငံတွင်လည်း ကုမ္ပဏီ ဖွင့်လှစ်ထားသေးသည်ကို တွေ့ရပြီး ကုမ္ပဏီ၏ ယခင်နာမည်မှာ ENR Holdings PTE. LTD ဖြစ်သည်။ ထို့နောက် Naung Yoe Technologies PTE. LTD ဟု နာမည်ပြောင်းခဲ့သည်။ စင်္ကာပူနိုင်ငံတွင် လက်ရှိအချိန်ထိ လုပ်ငန်းလည်ပတ်နေဆဲဖြစ်ပြီး ကုမ္ပဏီသက်တမ်းမှာ ၁၀ နှစ်နှင့် ၁၁ လကြာပြီဖြစ်သည်။ နောင်ရိုးကုမ္ပဏီ စင်္ကာပူ လိပ်စာမှာ 437 Woodlands Street 41, #02-368, 730437 ဖြစ်သည်။
HRW ၏ ထုတ်ပြန်ချက်
နေပြည်တော်နှင့် မန္တလေးမြို့တွင် တပ်ဆင်နေသည့် စီစီတီဗွီများနှင့် ပတ်သက်၍ လူ့အခွင့်အရေး စောင့်ကြည့်လေ့လာရေးအဖွဲ့ (Human Rights Watch) က ယခုနှစ် မတ်လက ကြေညာချက် တစ်စောင် ထုတ်ပြန်ခဲ့သေးသည်။
ထုတ်ပြန်ချက်တွင် နေပြည်တော် မြို့နယ် ၈ ခုမှာ လုံခြုံရေးကင်မရာ ၃၃၅ လုံး တပ်ဆင်ခဲ့ပြီး ဖြစ်သည်ဟု ဆိုသည်။ ထို့ပြင် ယင်းစီမံကိန်းအတွက် အမေရိကန်ဒေါ်လာ ၁.၂ သန်း အကုန်အကျခံခဲ့ကြောင်း ရေးသားထားပြီး “ကင်မရာများ တပ်ဆင်ရန်နှင့် ထိန်းချုပ်ရေးစင်တာများ တည်ဆောက်ရန် ပြည်တွင်းကုမ္ပဏီများဖြစ်သည့် Linn IT Solution နှင့် နောင်ရိုး ကုမ္ပဏီတို့ကို တင်ဒါချပေးခဲ့သည်” ဟု ဖော်ပြထားသည်။
နောင်ရိုးကုမ္ပဏီနှင့် ၎င်းနှင့် ဖက်စပ်လုပ်ငန်းလုပ်ကိုင်သည့် ကုမ္ပဏီများ၏ လိပ်စာများ
1. NAUNG YOE TECHNILOGIES COMPANY LIMITED - နံပါတ် (၁၆)၊ အောင်မင်းခေါင် (၂) လမ်း၊ ကမာရွတ်၊ ရန်ကုန်။
2. SPEED BIRD COMPANY LIMITED - နံပါတ် (၁၆)၊ အောင်မင်းခေါင် (၂) လမ်း၊ ကမာရွတ်၊ ရန်ကုန်။
3. NOVEL POWER COMPANY LIMITED - နံပါတ် (၁၆)၊ အောင်မင်းခေါင် (၂) လမ်း၊ ကမာရွတ်၊ ရန်ကုန်။
4. MANDALAY ELEGANT ENGINEERING COMPANY LIMITED - အဆောက်အအုံ နံပါတ် (၃၃)၊ အခန်း (၃၁)၊ ရွှေအုန်းပင် အိမ်ယာ၊ ရန်ကင်း၊ ရန်ကုန်။
5. NAUNG YOE TECHNOLOGIES TRADING COMPANY LIMITED - နံပါတ် (၁၁၀)၊ ဝေဇယန္တာလမ်း၊ (၃) ရပ်ကွက်၊ တောင်ဥက္ကလာပ၊ ရန်ကုန်။
6. NAUNG YOE TECHNOLOGIES CONSTRUCTION COMPANY LIMITED - နံပါတ် (၁၁၀)၊ ဝေဇယန္တာလမ်း၊ (၃) ရပ်ကွက်၊ တောင်ဥက္ကလာပ၊ ရန်ကုန်။
7. TRANSTEL COMMUNICATION (MYANMAR) COMPANY LIMITED - နံပါတ် (၉၂)၊ သီရိ ရတနာ ရှော့ပင်းကွန်းပလက်၊ ဇမ္ဗူသီရိ၊ နေပြည်တော်။
8. TEN FLOWERS COMPANY LIMITED - နံပါတ် (၉၂)၊ သီရိ ရတနာ ရှော့ပင်းကွန်းပလက်၊ ဇမ္ဗူသီရိ၊ နေပြည်တော်။
9. GREEN SOUND COMPANY LIMITED - နံပါတ် (၉၂)၊ သီရိ ရတနာ ရှော့ပင်းကွန်းပလက်၊ ဇမ္ဗူသီရိ၊ နေပြည်တော်။
နောင်ရိုးကုမ္ပဏီနှင့် အတူတွဲလုပ်သူ ပါတနာများ
သီတာတင့်လွင် - ၉/ကပတ (နိုင်) ၁၈၂၃၄၁
အေးအေးအောင် - ၁၁/သတန (နိုင်) ၀၆၁၆၉၄
ပြည့်ဖြိုးကျော် - ၁၂/ကတန (နိုင်) ၀၂၆၆၈၆
ရဲထွန်း - ၁၂/တမန (နိုင်) ၀၀၂၂၇၈
ဉာဏ်ဝင်းလှိုင် - ၁၂/အစန (နိုင်) ၁၅၆၉၄၉
စ အောင်လင်းသွေး - ၁၄/ဟသတ (နိုင်) ၀၀၁၂၃၁
အထက်ပါ ကုမ္ပဏီများတွင် ရဲဝင့်ထွဋ်တင် နာမည်ဖြင့် မှတ်ပုံမတင်ထားသည့် ကုမ္ပဏီများ ပါဝင်နေသော်လည်း ကုမ္ပဏီအများစု၏ ဒါရိုက်တာများမှာ နောင်ရိုးကုမ္ပဏီနှင့် ဖက်စပ် အလုပ်လုပ်ကိုင်နေသူများ ဖြစ်သည်ကို တွေ့ရသည်။ ထို့ပြင် ကုမ္ပဏီနာမည် မတူသော်လည်း ရုံးလိပ်စာနှင့် အလုပ်လုပ်ကိုင်ပုံ၊ ရှဲယာခွဲဝေမှုများမှာ နောင်ရိုးကုမ္ပဏီနှင့် ဆက်စပ် ပတ်သက်နေသည်ကို တွေ့ရသည်။
ကာကွယ်ရေးဝန်ကြီးဌာန၏ ပွဲစား နောင်ရိုး
ထို့ပြင် စ အောင်လင်းသွေး (၁၄/ဟသတ (နိုင်) ၀၀၁၂၃၁) ဆိုသူမှာ နောင်ရိုးကုမ္ပဏီ၏ ဘုတ်အဖွဲ့ဝင်စာရင်းတွင် မတွေ့ရသော်လည်း Hacking Team ဆိုသည့် နည်းပညာ ဝန်ဆောင်မှုပေးသည့် ကုမ္ပဏီကို စ အောင်လင်းသွေးက နောင်ရိုးကုမ္ပဏီနာမည်ဖြင့် ၂၀၁၄ ခုနှစ်က အီးမေးပို့ ဆက်သွယ်ခဲ့ဖူးသည်။ ယင်း အီးမေးတွင် ရဲဝင့်ထွဋ်တင်ကို CC (ကော်ပီတွဲထား) သည်ကို တွေ့ရှိရသည်။ သို့သော် စ အောင်လင်းသွေး၏ ရာထူးကို ဖော်ပြမထားပါ။
အီးမေးတွင် နောင်ရိုးကုမ္ပဏီက အီတလီနိုင်ငံ မီလန်မြို့ အခြေစိုက် နည်းပညာကုမ္ပဏီသို့ နည်းပညာဝန်ဆောင်မှု ရယူနိုင်ရန် မြန်မာနိုင်ငံ ကာကွယ်ရေးဝန်ကြီးဌာန ကိုယ်စား အောက်တိုဘာ ၂၃ ရက်၊ ၂၀၁၄ ခုနှစ်က စာပို့ဆက်သွယ်ခဲ့သည်ကို တွေ့ရသည်။ Hacking Team ၏ မိုဘိုင်းဖုန်းနှင့် ပတ်သက်သည့် နည်းပညာများကို ‘မြန်မာ ကာကွယ်ရေးဝန်ကြီးဌာနက စိတ်ဝင်စားသဖြင့်’ ကာကွယ်ရေးဝန်ကြီးဌာန ကိုယ်စား နောင်ရိုးကုမ္ပဏီက ဆက်သွယ်ခြင်းဖြစ်သည်ဟု ပါရှိသည်။
မြန်မာကာကွယ်ရေးဝန်ကြီးဌာနမှ ကာနယ်နှစ်ဦးနှင့်အတူ နောင်ရိုးကုမ္ပဏီက ဥရောပနိုင်ငံတစ်ခုသို့ သွားရောက်စဉ်က Hacking Team ၏အဆက်အသွယ် (Email) ကို ရရှိခဲ့ခြင်း ဖြစ်ကြောင်း စ အောင်လင်းသွေးက ရေးသားထားသည်။
ထို့ကြောင့် နောင်ရိုးကုမ္ပဏီသည် ၂၀၁၄ ခုနှစ် ဦးသိန်းစိန် အစိုးရလက်ထက်ကတည်းက မင်းအောင်လှိုင် စစ်တပ်အတွက် နောက်ကွယ်မှ အလုပ်လုပ်ပေးနေခဲ့သည်မှာ ထင်ရှားသည်။
Hacking Team ကုမ္ပဏီမှာ အင်တာနက်အသုံးပြုသူများကို စောင့်ကြည့်ထိန်းချုပ်နိုင်သည့် နည်းပညာများကို အစိုးရအဖွဲ့အစည်းများသို့ ဝန်ဆောင်မှုပေးနေသည့် ကုမ္ပဏီဖြစ်သည်။ ၂၀၁၅ ခုနှစ်တွင် ယင်းကုမ္ပဏီ၏ လုံခြုံရေးပေါက်ကြားမှု ဖြစ်ခဲ့ပြီး ကုမ္ပဏီသို့ ဆက်သွယ်ခဲ့သူများ၏ အချက်အလက်များ၊ ဆော့ဖ်ဝဲကုဒ်များနှင့် အီးမေးများ ပေါက်ကြားခဲ့သည်။ Mratt’s Channel က ရရှိထားသည့် အီးမေးမှာ ပေါက်ကြားခဲ့သည့် အီးမေးများအနက်မှ တစ်စောင်ဖြစ်သည်။
၂၀၁၉ ခုနှစ်တွင် Hacking Team ကုမ္ပဏီကို InTheCyber Group က ဝယ်ယူသွားခဲ့သည်ဟု သိရသည်။ သို့သော် နောင်ရိုး၏ ပွဲစားလုပ်ပေးမှုဖြင့် ဆက်သွယ်ခဲ့ပြီးနောက် Hacking Team က မင်းအောင်လှိုင်၏ ကာကွယ်ရေးဝန်ကြီးဌာနကို နည်းပညာဝန်ဆောင်မှု ပေးနေခဲ့သလား ဆိုသည်ကိုတော့ အတည်မပြုနိုင်ပါ။
ရဲဝင့်ထွဋ်တင် (သို့) နောင်ရိုး၏ ပဲ့ကိုင်ရှင်
အသိမိတ်ဆွေများက ကိုရဲ ဟု ခေါ်ကြသည့် ရဲဝင့်ထွဋ်တင် (မှတ်ပုံတင်နံပါတ် - ၂/ဒမဆ (နိုင်) ၀၁၂၄၃၁၊ ဒီမော့ဆို) သည် နောင်ရိုးကုမ္ပဏီ၏ ပိုင်ရှင်ဖြစ်သည်။ ဇနီးဖြစ်သူမှာ ခိုင်သက်မွန် (၁၂/ဗတထ (နိုင်) ၀၂၆၉၇၂၊ ဗိုလ်တထောင်) နှင့် သားနှစ်ဦးရှိပြီး မောင်ကောင်းဇုရဲဝင့်၊ မောင်ဧသုရဲဝင့်တို့ဖြစ်သည်။ သားနှစ်ဦးစလုံးမှာ ရန်ကုန်မြို့ရှိ Network International School တွင် ကျောင်းတက်နေသည်ဟု သိရှိရသည်။
သတင်းပေးလာသူ၏ အဆိုအရ ရဲဝင့်ထွဋ်တင်၏ ဖခင်မှာ ဗိုလ်သန်းရွှေလက်ထက်က နာမည်ကြီး ဗိုလ်ချုပ်တစ်ဦးဖြစ်သည်ဟု ဆိုသည်။ (Mratt’s Channel က ဆက်လက်စုံစမ်းနေဆဲ ဖြစ်သည်)
“သူ့အဖေက ရာထူးကြီးတော့ တခြား ဗိုလ်ချုပ်တွေက သူ့ကို တော်တော် ပါစားပေးကြတယ်။ သူ နိုင်ငံခြားမှာ ကျောင်းသွားတက်တယ်။ နိုင်ငံခြားက ပြန်လာပြီးနောက်ပိုင်း ကုမ္ပဏီတစ်ခု ထောင်လိုက်တယ်။ ပြီးတော့ စစ်တပ်အသိုင်းဝိုင်းက သူ့ကို ဝိုင်းပြီး ပံ့ပိုးလိုက်တော့ သူ့ကုမ္ပဏီက နေ့တွင်းချင်း အောင်မြင်သွားခဲ့တာ” ဟု ရဲဝင့်ထွဋ်တင်ကို သိရှိသူတစ်ဦးက ဆိုသည်။
ရဲဝင့်ထွဋ်တင်၏ နည်းပညာကုမ္ပဏီမှာ ၂၀၀၅ ခုနှစ်က စတင်တည်ထောင်ခဲ့သည်ဟု ဆိုသော်လည်း နည်းပညာအသိုင်းအဝိုင်းတွင် ရဲဝင့်ထွဋ်တင်ဟူသည့် နာမည်ကို သိရှိသူ နည်းပါးသည်။ သို့သော် ၂၀၁၀ ခုနှစ်ပိုင်းများတွင် အရှင်မွေး နေ့ချင်းကြီး ကြီးထွားလာခဲ့သည်။ ထို့နောက် ၂၀၁၅ ခုနှစ် ဒေါ်အောင်ဆန်းစုကြည် လက်ထက်၊ အစိုးရက ကြီးကြပ်ပြုလုပ်သည့် နည်းပညာဆိုင်ရာပွဲများတွင် ရံဖန်ရံခါ တွေ့လာခဲ့ရသည်ဟု ကိုယ်တိုင်ကြုံတွေ့ခဲ့ရသူများက ဆိုသည်။
“လူတွေက ပြောတယ်၊ ဒီလူ့ကို မိတ်ဆက်ထားပေါ့။ ကြည့်လိုက်တော့ နံမည်က ရဲဝင့်ထွဋ်တင်၊ ရထားတဲ့ ပရောဂျက်တွေကလည်း အကြီးကြီးတွေ၊ ဒါပေမယ့် နည်းပညာလောကမှာ အရင်က သူ့နာမည် တခါမှ မကြားဖူးခဲ့ဘူး၊ ရုတ်တရက်ကြီး ပေါ်လာတာ။ အရင်အစိုးရ (ဒေါ်အောင်ဆန်းစုကြည် လက်ထက်) က အစိုးရထဲက လူတော်တော်များများလည်း သူနဲ့အတူ အလုပ်တွဲလုပ်ခဲ့တာတွေ အများကြီးပဲ” ဟု နည်းပညာအသိုင်းအဝိုင်းမှ ပုဂ္ဂိုလ်တစ်ဦးက ဆိုသည်။
နောင်ရိုးကုမ္ပဏီမှာ နေပြည်တော်၊ ရန်ကုန်၊ မန္တလေးတို့တွင် ရှိသော်လည်း ရဲဝင့်ထွဋ်တင်မှာ နေပြည်တော်တွင်သာ ရုံးထိုင်လေ့ရှိသည်ဟု သိရသည်။ နောင်ရိုးကုမ္ပဏီ၏ နေပြည်တော်ရုံး လိပ်စာမှာ နံပါတ် (၉၂)၊ သီရိ ရတနာ ရှော့ပင်းကွန်းပလက်၊ ဇမ္ဗူသီရိမြို့နယ်ဖြစ်သည်။
တစ်ဖက်တွင်လည်း ရဲဝင့်ထွဋ်တင်သည် က ရန်ကုန် အားကစားနှင့် ကာယပညာဦးစီးဌာနကို စပွန်ဆာပေးကာ ‘နောင်ရိုးဖလား’ ဟူသည့် နာမည်ဖြင့် ပိုက်ကျော်ခြင်းပြိုင်ပွဲများ ကျင်းပခဲ့ဖူးသည်။ ရန်ကုန်၊ အောင်ဆန်းကွင်းတွင် ၂၀၁၉ ခုနှစ် ဒီဇင်ဘာလက ကျင်းပခဲ့သည့် ပိုက်ကျော်ခြင်းပြိုင်ပွဲတွင် တိုင်းလွှတ်တော် ဥက္ကဋ္ဌ ဦးတင်မောင်ထွန်းက ရဲဝင့်ထွဋ်တင်နှင့်အတူ အမှာစကား ပြောခဲ့သည်ကို တွေ့ရသည်။
ရဲဝင့်ထွဋ်တင်၏ ဇနီး Olivia ခိုင်သက်မွန် မှာလည်း နောင်ရိုးကုမ္ပဏီ၏ ဒါရိုက်တာ အဖွဲ့ဝင် တစ်ဦး ဖြစ်သည်။ မိဘများမှာ Agnes ဒေါ်ခင်သန်းရီ (ကွယ်လွန်) နှင့် Uniteam Martine Ltd (ငြိမ်း) မှ ဦးအောင်တိုး တို့ဖြစ်သည်။
နောင်ရိုး၊ ကြံ့ခိုင်ရေးပါတီနှင့် သာအေးတို့၏ ဆက်နွယ်မှု
ရဲဝင့်ထွဋ်တင်နှင့်အတူ ပူးတွဲအလုပ်လုပ်ကိုင်သူများအနက် ဦးသိန်းစိန် အစိုးရလက်ထက် လျှပ်စစ်နှင့်စွမ်းအင် ဝန်ကြီးဌာနလက်အောက်ရှိ ရေအားလျှပ်စစ် အကောင်အထည်ဖော်ရေး ဦးစီးဌာန၊ ဦးဆောင်ညွှန်ကြားရေးမှူး (ငြိမ်း) ဦးကြည်သာ၏သား ထင်လင်းသာ ဆိုသူလည်း ပါဝင်သည်။
ဦးကြည်သာမှာ ရခိုင်ပြည်နယ်တောင်ပိုင်း ဂွမြို့နယ်ဇာတိဖြစ်ပြီး ကြံ့ခိုင်ရေးပါတီ ဗဟိုကော်မတီဝင် ဖြစ်သည်။ သားဖြစ်သူ ထင်လင်းသာ မှာ နောင်ရိုးကုမ္ပဏီ၏ အမှုဆောင် ဒါရိုက်တာ ဘုတ်အဖွဲ့ဝင် ဖြစ်ခဲ့ဖူးကြောင်း ၂၀၁၇ ခုနှစ်မှ အထောက်အထားများအရ သိရသည်။
ဦးကြည်သာတွင် ထင်လင်းသာအပါအဝင် သားသမီးသုံးယောက် ရှိသည့်အနက် သမီးဖြစ်သူ ဟေမန်ကြည်သာ က စစ်ကိုင်း၊ ဘုတလင်မှ နာမည်ကျော် ဗိုလ်ချုပ်သာအေး၏ သားဖြစ်သူ စည်သူအေးအောင်နှင့် လက်ထပ်ခဲ့သည်။ စည်သူအေးအောင် ဆုံးပါးသွားသည်မှာ မကြာသေးပါ။ သာအေး ဆိုသူအကြောင်း အထူးအထွေ ဖော်ပြရန်လိုမည် မထင်ပါ။
ဗိုလ်သိန်းစိန် အစိုးရလက်ထက် စစ်ကိုင်းတိုင်းဝန်ကြီးချုပ် လုပ်ခဲ့ဖူးပြီး လက်ပံတောင်းတောင် အရေးအခင်းတွင် သံဃာတော်များကို မီးလောင်ဗုံး ဆက်ကပ်ခဲ့သည်ဟု နာမည်ကြီးခဲ့သူ ကြံ့ခိုင်ရေးပါတီမှ ဒုဗိုလ်ချုပ်ကြီး သာအေး ဖြစ်သည်။ ဦးကြည်သာ၏သား ထင်လင်းသာမှာ လက်ရှိ စစ်ကောင်စီကို ကူညီပေးနေသည့် နောင်ရိုးကုမ္ပဏီနှင့်ဆက်စပ်နေခဲ့သလို သမီး ဟေမန်ကြည်သာမှာလည်း စစ်အုပ်စုနှင့် နီးစပ်သူဖြစ်သည်။
နောင်ရိုးကုမ္ပဏီသည် စစ်ကောင်စီကို ကူညီလုပ်ကိုင်ပေးနေသည့် နည်းပညာကုမ္ပဏီ ဖြစ်သည့်အတွက် ၎င်းတို့နှင့် ဆက်စပ်လုပ်ကိုင်သည့် ကုမ္ပဏီများ၊ လူပုဂ္ဂိုလ်များကိုပါ တဆက်စပ်တည်း ဖော်ပြရခြင်းဖြစ်သည်။ နောင်ရိုးကုမ္ပဏီမှာ မင်းအောင်လှိုင်၏ စစ်ကောင်စီကို ကူညီပေးနေသည့် ကုမ္ပဏီများအနက်မှ ကုမ္ပဏီတစ်ခုသာဖြစ်ပြီး ကျန် ကုမ္ပဏီငယ်များစွာလည်း ရှိနေသေးသည်။
စစ်ကောင်စီကို နည်းပညာဖြင့် အကူအညီပေးနေသည့် ကုမ္ပဏီများ | အပိုင်း (၂) ကို ဆက်လက်ဖော်ပြပါမည်။
