အဆိုတော်ဇော်ဝင်းထွဋ်ရဲ့သား အီတိုးနေထိုင်တဲ့ အိမ်ဟာ ရန်ကုန်မြို့ ၉ မိုင် မစိုးရိမ်ကျောင်းလမ်းထဲမှာ ရှိပါတယ်။ စက်တင်ဘာ ၈ ရက်နေ့ မနက် ၄ နာရီလောက်ကတည်းက ဒီလမ်း တစ်ဖက်တစ်ချက်ကို စစ်တပ်က ပိတ်ထားခဲ့ပြီး လမ်းထဲနေသူ အတော်များများကတော့ သိပ်မသိခဲ့ကြပါဘူး။
အဲ့ဒီနားမှာရှိတဲ့ ရွှေမြိုင်သီရိ သီလရှင်ကျောင်းအနီးဝန်းကျင်မှာလည်း စစ်တပ်က နေရာယူထားခဲ့ပါတယ်။ မနက်ပိုင်း ၈ နာရီမခွဲခင်မှာ အီးတိုးကို ဖမ်းသွားတာ ဖြစ်နိုင်တယ်လို့ ဆိုကြပါတယ်။
"သိရသလောက်တော့ အရင်ဆုံး ဂေါက်ကလပ်နဲ့ ကပ်လျက် အနောက်ခြမ်းကို အရင်ပိတ်လိုက်ပါတယ်။ ပြီးတော့ ခြံအနောက်ဖက်ကို အရင်ပိတ်ချလိုက်ပြီးမှ အပေါ်လမ်းကို ပိတ်ချလိုက်ပြီး ဖမ်းသွားတယ်လို့ ယူဆရပါတယ်" လို့ သတင်းရင်းမြစ်တစ်ဦးက ဆိုပါတယ်။
နံနက် ၈ နာရီခွဲမတိုင်ခင်က မစိုးရိမ်ကျောင်းလမ်းကို တစ်ဖက်တချက် ပိတ်ထားခဲ့ပြီး ၈ နာရီခွဲမှာ ပြန်လည် ဖွင့်ပေးလိုက်တာကို တွေ့ရတယ်လို့ ကိုယ်တိုင်ကြုံတွေ့ခဲ့ရသူတွေက ဆိုပါတယ်။
"လမ်းက ပုံမှန်ဆို လူပြတ်တယ်။ အနီးဝန်းကျင်နား နေတဲ့လူတွေလောက်ပဲ အဲ့ဒီမှာ အီတိုးနေတယ်ဆိုတာ သိကြတာ။ အဲ့နေ့ မနက်ပိုင်းက စစ်သားတွေ သူ့ခြံထဲရောက်နေတာ မြင်ခဲ့ရတယ်။ သူ့ စတူဒီယိုလည်း အဲ့ဒီမှာပဲ" လို့ သတင်းရင်းမြစ်တစ်ဦးက ဆိုပါတယ်။
ထို့ပြင် "အီတိုးအိမ်ကို စစ်တပ်က ဝင်တယ်ပေါ့၊ ဒီလောက်ပဲ သိကြရတယ်။ သတင်းတွေ့မှ ဖမ်းသွားပြီဆိုတာ သိရတာ" လို့ နောက်ထပ် သတင်းရင်းမြစ်တစ်ဦးက ဆိုပါတယ်။
