ပြီးခဲ့သည့် ဇူလိုင်က ကွက်မျက်ခံခဲ့ရသည့် ကိုဂျင်မီနှင့် ကိုဇေယျာသော်တို့အတွက် ဝမ်းနည်းခြင်း အထိမ်းအမှတ် ရည်စူးပြုလုပ်သည့် အင်းစိန်ထောင်တွင်းမှ နိုင်ငံရေးအကျဉ်းသား ၂၀ ကျော် နှိပ်စက်ညှင်းပန်းခံခဲ့ရကြောင်း ယုံကြည်ရသည့် သတင်းရင်းမြစ်ထံမှ ယမန်နေ့က ရရှိထားသည့် အသံဖိုင် မှတ်တမ်းများအရ သိရသည်။
ပြီးခဲ့သည့် အောက်တိုဘာ ၂၃ သည် ကိုဂျင်မီနှင့်ကိုဇော်ယျာသော်တို့ အင်းစိန်ထောင်တွင်း ကွက်မျက်ခံရသည့် ၃ လပြည့်ဖြစ်ပြီး အသံဖိုင်အရ ယင်းနေ့တွင် နိုင်ငံရေးအကျဉ်းသားများက အနက်ရောင်လက်ပတ်များ ဝတ်ဆင်ကာ ဆွမ်းကပ်ခဲ့ကြသည်။
ထို့ကဲ့သို့ အထိမ်းအမှတ်ပြုလုပ်ခဲ့ခြင်းကို ၅ ဆောင်၊ ၁ ခန်း သူကြီးက အဆောင်မှုးကို တိုင်တန်းကာ ပါဝင်သူများကို ရိုက်နှက်ဖမ်းဆီးခိုင်းခဲ့သည်ဟု အသံဖိုင်မှတ်တမ်းတွင် ပြောကြားထားသည်။
ဦးဆောင်သူများဖြစ်သည့် “ကိုရဲရင့်ကို၊ ကိုရဲရင့်ဘို၊ ဝသုန်စံ၊ ကိုဟန်သာတို့ကို ရိုက်နှက်ပြီး ခြေထောက်တွင် ဒေါက်တပ်၍ ၆ တိုက်တွင် တိုက်ပိတ်ခဲ့” သည်ဟု ဆိုသည်။
ယင်းတို့အနက် ကိုဝသုန်စံမှာ ရန်ကုန် တော်လှန်ရေးညီအစ်ကိုများ (Yangon Revolution Brotherhood – YRB) မှ ဖြစ်ပြီး စစ်ကောင်စီက ယမန်နှစ် စက်တင်ဘာ ၂၅ ထုတ် သတင်းစာတွင် ကိုဇေယျာသော်နှင့်အတူ ဆက်စပ်ဖော်ပြခဲ့ဖူးသည်။
ထို့ပြင် အထိမ်းအမှတ်ပြုလုပ်ရာတွင် ပါဝင်သည့် သက်ကိုကိုထွေး၊ ကျော်ကျော်ခန့်၊ စိုးကိုကို၊ အောင်ပြည့်စုံဦး၊ ကျော်သက်ပိုင်၊ ရဲလင်းအောင်၊ ဇော်ဇော်ဟန်၊ ဇေယျာဖြိုး၊ ဖိုးကောက်၊ နတ်ဆိုး၊ ရဲကျော်၊ J ညီ၊ ညီဇင်လတ်၊ ချမ်းမြေ့ကိုကိုဇင်၊ အောင်မင်းခန့်၊ နိုင်ထာဝရ၊ အောင်ကိုမင်း တို့ကိုလည်း ရိုက်နှက်စစ်ဆေးမေးမြန်း၍ နှစ်ယောက် တစ်တွဲစီ ခြေထောက်တွင် ဒေါက်တပ်ကာ ၅ ဆောင်ရှိ အခန်းများသို့ ပြန်ပို့ခဲ့သည်ဟု ဆိုသည်။
ဦးဆောင်သူ ၄ ဦးကို ခြေတွင် ဒေါက်တပ်ကာ တိုက်ပိတ်ထားသည့်အပြင် ထမင်းအသိုးများကို မြေကြီးပေါ် နင်းခိုင်းခြင်း၊ မိလ္လာခပ်ခိုင်းခြင်းတို့ကို ရိုက်နှက်စေခိုင်းခဲ့သည်ဟု ဆိုသည်။ “မင်းတို့ကို သတ်ပစ်လိုက်လို့ ရတယ်။ စာရွက်တစ်ရွက်ပဲ ကုန်မယ်" ဟု နိုင်ကျဥ်းများအား ခြိမ်းခြောက်ခဲ့ကြောင်းလည်း အသံဖိုင်တွင် နားဆင်ရသည်။
ပြီးခဲ့သည့် အောက်တိုဘာ ၁၉ က အင်းစိန်ထောင် ထောင်ဝင်စာ ပါဆယ်လက်ခံသည့်နေရာတွင်ပေါက်ကွဲမှု ဖြစ်ပြီးနောက် အပြင်မှ မကျေနပ်ချက်များကို နိုင်ကျဥ်းများအပေါ်တွင် ပုံချနေပြီး၊ ထောင်အာဏာပိုင်များက ခိုးဆိုးလုနှိုက်တန်းစီးများ ပူးပေါင်းကာ နိုင်ကျဥ်းများကို ဖိနှိပ်နေသည်ဟု ဆိုသည်။
အဆိုပါတိုက်ပိတ်ခံရသူများနှင့် ခြေတွင် ဒေါက်တပ်ခံရသည့် ၁၇ ဦးအနက် အချို့မှာ ယမန်နေ့ အောက်တိုဘာ ၃၁ က ရုံးချိန်းရှိသော်လည်း ထွက်မလာနိုင်ခဲ့ကြဟုလည်း သိရသည်။ ၎င်းတို့၏ ကျန်းမာရေး အခြေအနေများနှင့် ပတ်သက်၍ အသေးစိတ် မသိရှိရပေ။
